* * *
Մի թռչուն կա պստլիկ,
Մարմին ունի կլորիկ,
Կտուցը կարճ ու հաստլիկ,
Ճկճկում է սիրունիկ։
* * *
Մի թռչուն կա պուրակում,
Ինքը պստիկ, մոխրագույն,
Քիչ ենք տեսնում մենք նրան,
Բայց երգերն են աննման։
* * *
Մի թռչուն կա շուտ չվող,
Ցանկալի գարուն բերող,
Որս է անում թռչելով,
Բույնը շինում մարդկանց քով։
* * *
Մի թռչուն կա կչկչան,
Պոչը երկար, տմբտմբան,
Թե վարժեցնեք դուք նրան,
Կխոսի մարդու նման։
* * *
Ցերեկով նա կույր է, կույր,
Ձայն է հանում միշտ տխուր,
Որս է անում գիշերով,
Իր սոսկալի ճանկերով։
* * *
Մի թռչուն կա հավի չափ,
Սիրած տեղն է լեռ, քարափ,
Համեղ միս է տալիս մեզ,
Լավ է երգում նա այնպե՜ս...
* * *
Մի թռչուն կա կռավան,
Զգույշ է գողի նման,
Գիշատիչ է անկշտում,
Մարդիկ նրան չեն սիրում։
* * *
Մի թռչուն կա սպիտակ,
Վիզը երկար ու բարակ,
Ոտները ձիգ, այլանդակ,
Թռիչք ունի համարձակ։
* * *
Մի թռչուն կա հորթի պես,
Ոտներ ունի գազ ու կես,
Անապատում արևկեզ
Վազ է տալիս ձիու պես։
Ի՞նչ թռչուններ են - Հայրապետ Հայրապետյան
Հետաքրքիր է նաև
Մեկնաբանել