• 26 մայիս, 2024
     Կարուսել - Վահան Տերյան

    Կարուսել - Վահան Տերյան

    Պտտվի՛ր, պտտվի՛ր, կարուսել,
    Ես քո երգը վաղուց եմ լսել…

    Հեքիաթ էր, և հմայք, և անծիր
    Խնդություն մշուշում վարդագույն,
    Դու նենգոտ քնքշությամբ ժպտացիր
    Արևոտ ժպիտով իմ հոգուն…

    Սիրո խոսք, և համբույր, և խոստում…
    - Արբեցե՛ք այս անուշ համերգում, -
    Արդյոք մե՞նք, թե՞ խոսքերն են ստում,
    Արդյոք մե՞նք, թե՞ աշխարհն է երգում։

    Պտտվի՛ր, պտտվի՛ր, կարուսել,
    Ես քո երգը վաղուց եմ լսել…

    Կար հեռու մի երկիր թովչական,
    Արև էր ոսկեղեն աշխարհում.
    Շողացին, ժպտացին - էլ չըկան,
    Էլ չըկան պատրանքները սիրուն։

    Ե՛վ թախիծ, և՛ տրտունջ, և՛ տանջանք,
    - Դո՞ւ ես այն, թե՞ աշխա՞րհն է լացում.-
    Խավարիր, խաբուսիկ անրջանք,
    Հեռավոր օրերի հիացում…


    Պտտվի՛ր, պտտվի՛ր, կարուսել,
    Ես քո երգը վաղուց եմ լսել…

    Կար մի երգ հեռավոր աշխարհում,-
    Դու այն երգն ես կրկնում հեռավոր -
    «Ես սիրում եմ, դու ինձ չես սիրում,
    Եվ հին են քո խոսքերը բոլոր…

    Եվ այն վալսը «Անդարձ ժամանակ»,
    Ծառուղին՝ ամայի պուրակում,
    Ե՛վ գիշեր, և՛ համբույր, և՛ լուսնյակ...
    Տաղտկալի՜, ձանձրալի՜ պատմություն…

    Պտտվի՛ր, պտտվի՛ր, կարուսել,
    Ես քո երգը վաղուց եմ լսել…

    Պարում են խելագար խնջույքում,
    - Ով կուզե՝ թող գաղտնիքն իմանա, -
    Ոչ վերջ կա, ոչ ըսկիզբ այս երգում, -
    Երեկ՝ ես, այսօր՝ դու, վաղը՝ նա…

    Պտտվի՛ր, պտտվի՛ր, կարուսել,
    Ես քո երգը վաղուց եմ լսել…

    Ամենից լավ տունը, Հովհաննես Թումանյան

    Ամենից լավ տունը, Հովհաննես Թումանյան

    Նախորդը

    Մի խառնեք մեզ ձեր վայրի, արջի ցեղերին - Վահան Տերյան

    Մի խառնեք մեզ ձեր վայրի, արջի ցեղերին - Վահան Տերյան

    Հաջորդը

    Մեկնաբանել