Շուտով մոտենում է սեպտեմբերը, և սկսվելու է ուսումնական նոր տարին, որին սրտի թրթիռով սպասում են հատկապես առաջին դասարանցիները և նրանց ծնողները։ Ծնողներն անհանգստություններ ունեն երեխայի պատրաստվածության համար. արդյոք երեխան պատրաստ է, թե՞ ոչ։ Դպրոցին պատրաստվելու ժամանակն ավելի արդյունավետ օգտագործելու համար խորհուրդ է տրվում ավելի ինտենսիվ զարգացնել երեխայի հետևյալ հմտությունները, որոնք իրեն դպրոցում և ամբողջ կյանքում կօգնեն ավելի հեշտ յուրացնել ցանկացած գիտելիք և տեղեկություն:
- Տրամաբանություն
- Մանր մատորիկա
- Ինքնուրույնություն
- Հիշողություն
- Արագություն
- Կենտրոնացում
- Ուշադրություն
- Համբերատարություն
Դե իհարկե այս ամենին նպաստում է խաղը։
Կարևոր է խաղի միջոցով հետաքրքրություն առաջացնել շրջապատող միջավայրի նկատմամբ, ձևավորել բացահայտելու կարողություն, զարգացնել հետաքրքրասիրությունը, հնարամտությունը, երևակայությունը, սրամտությունը, ինքնատիպությունը, ճկունությունը, մտածողության լայնությունն ու խորությունը։ Խաղը հիմք է ստեղծում կրթական գործունեության համար։
Հայ մեծ բանաստեղծ Հ. Թումանյանը գրել է. «Խաղը մանուկ մարդու բնական, օրգանական պահանջն է, նրա լրջությունն է, նրա էությունն է: Կյանքում ամեն բանի նա խաղով է մոտենում, դա նրա ձևն է, դա նրա մեթոդն է: Եվ ամեն բան, ինչ որ նրան տրվում է խաղով, ուրախությունով ընդունում է, հեշտ էլ յուրացնում`առանց ձանձրանալու, առանց հոգնելու»:
Խաղ ՝ «Գտիր համապատասխանող պատկերը»
Նպատակը՝ զարգացնել երևակայությունը, հիշողությունը, ուշադրությունը, արագ կողմնորոշվելու կարողությունը, ամրապնդել տարվա եղանակների մասին գիտելինքները։
Անհրաժեշտ պարագաներ՝ տարվա չորս եղանակները պատկերող նկարներ և դրանք բնորոշող փոքր քարտեր/ նկարներ։
Ընթացքը՝ երեխաները ընտրում են տարվա չորս եղանակները պատկերող նկարներ և սեղանին դրվում են փոքր քարտեր, որոնք բնորոշում են տվյալ եղանակ։ Երեխաները խաղում են և՛ անհատական, և՛ խմբերով։
Խաղի կանոնը՝ երեխաները պետք է կարողանան տրված ժամանակի ընթացքում գտնել տարվա տվյալ եղանակը բնորոշող խաղաքարտերը և շարել նկարի տակ։ Հաղթում է այն երեխան կամ այն խումբը, որը արագ ու անսխալ է կատարում առաջադրանքը։
Խաղ՝ «Ուրվագծել»
Նպատակը զարգացնել կենտրոնացումը, ուշադրությունը , տեսողատարածական կողմնորոշումը , աչք -ձեռք կապը, ձեռքերի համաձայնեցված շարժումները։
Անհրաժեշտ պարագաներ՝ տարբեր պատկերներ, ձևեր ունեցող տարբեր առարկաներ , թուղթ, գրիչ։
Ընթացքը՝ երեխան թղթի ցանկացած մասում դնում է առարկան և ուրվագծում։ Հետո դնում է մի կողմ և վերջում փորձում է հետ բերել առարկան և դնել ըստ համապատասխան ուրվագծի։
Կարելի է նաև հարցերի միջոցով ամրապնդել աջ ,ձախ ,մեջտեղ ,վերև ,ներքև հասկացությունները։
Հեղինակ՝ Մարիաննա Խաչատրյան, Մանկավարժ
«Մալխասյան» Խոսքի Զարգացման Կենտրոն
Հեռ․ 044888312
Հասցե՝ Ք․ Երևան, Մանթաշյան 41
Հետաքրքիր է նաև․․․
ՎԵՐՋԻՆՆԵՐԸ
All Rights Reserved © 2023