Երևանի քաղաքապետ Հայկ Մարությանը իր ֆեյսբուքյան էջում շնորհավորել է Մայրության և գեղեցկության օրը․
«Օրհնյալ ես դու ի կանայս, և օրհնյալ է պտուղ որովայնի քո» (Ղուկ. 1: 42-43)։
Այսօր Ավետման տոնն է՝ Մայրության և գեղեցկության օրը։
Խոնարհվում եմ պատերազմի ողջ դառնությունը իրենց ուսերին կրած կանանց առաջ։ Նրանց, ովքեր ցանցեր էին հյուսում, սնունդ ու դեղորայք ուղարկում ռազմաճակատի համար, նրանց, ովքեր իրենց տներում հյուրընկալել էին արցախցի քույրերին ու երեխաներին, նրանց, ովքեր ներգրավված էին բուժանձնակազմերում, բոլոր նրանց, ովքեր իրենց աշխատանքն էին անում այդ դժվարին օրերին ու դրանից հետո էլ։
Խոնարհվում եմ բոլոր նրանց առաջ, ում որդիները, եղբայրներն ու ամուսինները նահատակվեցին հանուն հայրենիքի։ Ձեր որդիների զոհողությունը մեզ պարտավորեցնելու է մեր ողջ կյանքի ընթացքում, ստիպելու է մեզ ավելի լավ երկիր կառուցել՝ ավելի արդար, ավելի բարեկեցիկ, ավելի անվտանգ,- գրել է քաղաքապետը։
Մեկնաբանել