Յոգայի դիրքեր ամսական ցիկլերի օրերին

Արդյո՞ք կանայք և աղջիկները կարող են յոգայի դիրքեր կատարել ամսական ցիկլի օրերին: 

Ասեմ, որ կարելի է և նույնիսկ խրախուսվում է, բայց… 

Կա մի քանի բայց: Նախ և առաջ հարկավոր է լսել սեփական մարմնին և, եթե կան խիստ սահմանափակող ցավեր, որոնց պատճառով հնարավոր չէ կատարել ֆիզիկական վարժություններ, ապա մի բռնացեք ինքներդ Ձեզ: Դրա փոխարեն կատարեք յոգայի դիրքեր և պրակտիկաներ մնացած այլ օրերին, որոնք էլ կմեղմեն ընդհանուր վիճակը հետագայում:

Մնացած բոլոր դեպքերում կարելի է կատարել վարժությունները, որոշակի սահմանափակումներով:

Ցանկալի է, որ ցիկլի օրերի պրակտիկան լինի մեղմ և սահուն, առանց ուժային դիրքերի և ինվերսիաների (հակառակ, գլխիվայր դիրքերը հակացուցված են): 

• Կատարեք փափուկ ձգումներ, և մնացեք մի փոքր ավելի երկար դիրքում, քան սովորաբար: 

• Օգտագործեք հավելյալ պարագաներ անհրաժեշտության դեպքում՝ բարձ, գոտի, ծածկոց, որպեսզի մարմինը չունենա հավելյան լարվածություն: 

• Ավելի շատ ուշադրություն դարձրեք շնչառությանը և ձգտեք դիրքերում հանգստի վիճակին հասնել: 

Հարկավոր է ավելի հոգատար լինել սեփական մարմնի հանդեպ և կատարել դիրքեր, որոնք կվերականգնեն Ձեր էներգիան և լավ ինքնազգացողությունը:

Ինչպե՞ս կարող է յոգան օգնել:

• Ճիշտ ընտրված ասանաները կարող են կարգավորել ցիկլի հաճախականությունը
• Ապահովել կոնքի և որովայնի հատվածի մերսում
• Տալ մարմնին թեթևության զգացողություն
• Հաղթահարել ընդհանուր թուլությունը և տրամադրության տատանումները
• Տալ  ներդաշնակության և ներքին հավասարակշռության զգացում

Սակայն մշտապես եղեք զգոն և վստահեք Ձեր մարմնին և զգացողություններին, խուսափեք արհեստական ջանք գործադրելուց:

Սիրով ներկայացնում եմ առավել օգտակար մի քանի դիրք

Թիթեռի դիրք

Հարկավոր է նստել հարմարավետ հատակին, կամ բարձին, միացնել ոտնաթաթի տակերը իրար և ուղղել մեջքը: Ծնկները փորձեք իջեցնել դեպի հատակը: Կարգավորեք շնչառությունը այստեղ, մնացեք դիրքում 3ից 5 րոպե: Հարկ եղած դեպքում հենվել պատին:

Պարկած թիթեռի դիրք

Վերցրեք երկարավուն բարձ, կամ ծալված ծածկոց: Նստեք հատակին այնպես որ բարձի եզրը Ձեր պոչուկին մոտ լինի և պարկեք հետ, համոզվեք որ ամբողջ իրանը և գլուխը բարձին են: Ոտնաթաթերի տարկեը միացրեք իրար և կրունկները մոտեցրեք Ձեզ: Հարկ եղած դեպքում գլխի և ազդրերի տակ դրեք ծալված ծածկոց: Մնացեք դիրքում 5ից 10 րոպե:

Կատու եւ կով դիրք

Տեղավորեք ծնկները ուղիղ կոնքի տակ հատակին և ձեռքերը ուղիղ ուսերի տակ: Արմունկները ուղիղ պահելով, շնչով նայում ենք վերև և ճկում գոտկային հատվածը, արտաշնչով նայում ենք մեր որովայնի ուղղությամբ և կորացնում մեջքը դեպի վեր:

Կարելի է կատարել 6ից 10 ցիկլ:

Նստած հերոսի դիրք

Ծնկները պահպանելով մոտիկ,հեռացրեք ոտնաթաթերը այնպես, որ տարածություն ազատվի ոտնաթաթերի միջև, նստեք հատակին կամ փոքրիկ բարձին, երկու կրունկների միջև: Պահպանեք մեջքը ուղիղ, մնացեք դիրքում 2-ից 5 րոպե:

Հեղինակ՝ Սոնա Հարությունյան

Յոգայի մարզիչ